WhakamĀrama Āpitihanga
Kāore te kirihou e pōpopo. He wā roa, kātahi ka ngāwherewhere, engari ka noho tonu ngā kongakonga kirihou mō ake tonu atu, waihoki ka whakaputaina he matū kino hei tāhawahawa i te taiao. Hei tauira, ko te para reremoana kei tētahi papakāinga takutai i Mareia, me te kirihou moroiti e rere noa ana i ō tātou arawai:
He whakararu kei ngā wāhanga katoa o te whakamahinga kirihou. Arā:
- Ko ngā haurehu kati mahana ka tukuna ki te hau takiwā i te hukenga ake o te hinu me te tukanga rāwekeweke i te hinu kia hua ake he kirihou.
- Ko te tukutanga o te kirihou moroiti me ōna matū tāoke ki ngā arawai, ki te hau takiwā, ki te oneone anō hoki, i te wā e whakamahia ana he hautaonga kirihou, i te wā rānei e hangaruatia ana.
- Ko te urunga atu o ngā tūemi kirihou porowhiu ki te taiao, nā te porowhiu taurekareka, nā te ngoikore rānei o ngā tūāhanga para me ngā pūnaha para.
- Ko te parahanga ka hua ake i te porowhiunga whakamutunga o te kirihou ki te ruapara, pēnei i te wai whakapākeka tāoke ka papī ake ki te oneone me ngā arawai. Mēnā ka tahuna, he parahanga hau tāoke te hua.
He take huatika pāpori hoki te parahanga kirihou, inā te mahi a ngā whenua whairawa ki te tuku i ā rātou para ki ngā whenua pōhara, ki reira tukatukatia ai, ki reira tāhawahawa ai i te taiao. Ka kīia tērā mahi ko te tāmitanga ā-para.