WhakamĀrama Āpitihanga
He maha ngā momo papanga, ko ētahi ka whatua ki ngā kaka ka hua mai i te taiao, pērā i te papamuka. Ko ētahi ka whatua ki ngā kaka horihori ka hua i tā te tangata rāwekeweke i ngā matū pērā i te hinu. Koia nei ngā whakamārama mō ētahi:
Te kānawehi: He kaitara, he āhua taumaha tēnei papanga, whatua ai ki te miro kātene , ki te kōaka, ki te hutu rānei. Mātua whakamahia ai hei papa peita, hei hanga tēneti hoki.
Te kariko: Whatua ai te kariko ki te miro kātene. He mā, he āhua kau noa, kāore he whakapaipai.
Te kirihunga: He kiri kararehe, kua wakua tētahi taha kia perehunga ai.
Te ngaiaku: He kaka hangaia ai e te ringa tangata. Ina whatua, ka puta he papanga rauangi, he māheniheni.
Te papahune: Whatua ai ki te kaka māene ka puta i te tipu kātene e whakatupuria ana ki ngā whenua o tāwāhi pērā i Amerika. E tino whakamahia ana te papahune hei tui kākahu.
Te papamaene: Whatua ai te papamaene ki te kaka rauangi ka puta i te noke hiraka. He maene, he mōhinuhinu, he kaha tēnei papanga.
Te papamōhinu: He maene, he mōhinuhinu tēnei papanga. He āhua rite ki te papamāene engari he papanga horihori, kāore i takea mai i te kaka māori.
Te papamōnehu: Whatua ai tēnei papanga ki te kātene, ki te papamāene, ki te ngaiaku rānei. Ka whatua kia tino pipiri ngā kaka, ā, he mōnehunehu tētahi taha.
Te papamuka: Whatua ai tēnei papanga i te muka o te harakeke. He kaha ake i te papahune, he māene anō hoki.
Te paparai: Whatua ai ki te miro kātene, he āhua mātotoru tēnei papanga, e whai ripa ana.
Te raikara: He momo papanga kūtoro, hangaia ai e te tangata. He angiangi, he kūtorotoro, ka mātua whakamahia hei tuitui kahu hākinakina.
Te tāngari: He āhua mārō tēnei papanga, whatua ai ki te kātene.
Te tapeha: He momo kirihou tēnei papanga, hangaia ai e te tangata. He kaha, ā, mātua whakamahia ai hei uhi nōhanga.
Te tāpora: He pūtiotio, he kaitara tēnei papanga, whatua ai ki te kōaka, ki te hutu rānei.
I ētahi toi ataata, whakamahia ai te papanga hei rawatoi, pērā i te toi piripiri:
I ētahi toi ataata, whakamahia ai te papanga hei papa mō te mahinga toi, pērā i te tapa, me te kara.
I ētahi toi ataata, ka tuia te papanga hei whakaputa mahinga toi, pērā i te tui whakaniko.
Rerehau Pasene-Grenell
Ngaru
Te tui whakaniko i te miro kātene