WhakamĀrama Āpitihanga
Tērā ko te kauhoe au moana, tērā hoki te kauhoe i rō hōpua. Mō ētahi he mahi a te rēhia, mō ētahi he whakapakari tinana te whāinga, mō ētahi he whakataetae te kaupapa.
I ngā whakataetae kauhoe, ka whakawehea te hōpua ki ōna ara kūiti, ā, ko ia kaikauhoe ka mau ki tōna ake ara. He ruku te tīmata a tēnei kaikauhoe:
Ko te kau tāwhai tētahi tāhoe matua. He tāpapa te tinana i te kārewa o te wai, ka whanawhana ngā waewae, ā, ka hohoko te toro whakamua i ngā ringa me te tō whakamuri i roto i te wai, mā reira e kōpanaia ai te tinana:
Ko te kau kiore tēnei. Ka tīraha te tinana i te kārewa o te wai, ā, mā te whanawhana o ngā waewae me te hohoko o te toro whakamuri o ngā ringa me te tō i roto i te wai e kōpanaia ai te tinana:
Ko te kau āpuru tēnei tāhoe. E tāpapa ana te kaikauhoe i te wai, ka toro whakamua ōna ringa e rua ka tō whakamuri ai. Ka nuku whakamua ngā waewae e rua, ka tākiri whakamuri ai:
Ko te kau aihe tēnei. E tāpapa ana te kaikauhoe i te wai, ka hīkina ngā ringaringa e rua ki ngā taha, ka toro whakamua ai, kātahi ka tō whakamuri i te wai. He whana aihe te whanawhana o ngā waewae, arā, he tīemiemi i roto i te wai:
I ētahi o ngā tāhoe, ka tae atu te kaikauhoe ki te pito o te hōpua, ko te turupeke tana huri kia tauaro ai tana anga, ā, ka kauhoe tonu.
Ko te kau takawhitiwhiti tētahi tauwhāinga kauhoe, arā, ko ngā tāhoe e whā i te tauwhaiwhai kotahi.